Արթուր Գրիգորյան

Միջնակարգ դպրոցին զուգահեռ սովորել է Տիգրան Չուխազյանի անվան երաժշտական դպրոցի միաժամանակ երկու բաժիններում՝ դաշնամուրի և կոմպոզիցիայի։

1975-1979-ին սովորել է Երևանի Ռոմանոս Մելիքյանի անվան երաժշտական ուսումնարանում։ Ուսումնարանում սովորելու տարիներին Երևանի Օրջոնիկիձեի շրջանի պիոներ պալատին կից հիմնել և ղեկավարել է «Խատուտիկ» մանկական վոկալ գործիքային համույթը։

1984-1988-ին հեռակա կարգով սովորել է Մոսկվայի թատերական արվեստի պետական ինստիտուտում՝ ռեժիսուրա բաժնում։

1979-1981-ին ծառայել է ՀԽՍՀ զինված ուժերում։

1981-1983-ին, ապա 1987-ին դասավանդել է «Հայհամերգ» էստրադային ստուդիայում «ջազի պատմություն» առարկան։

1983-1984-ին աշխատել է Գեղագիտության ազգային կենտրոնում որպես արվեստի մեթոդաբան։

1985-1988-ին եղել է «Պոպուլյար» վոկալ գործիքային անսամբլի դաշնակահար և բաս կիթարահար։ 

1992-ին նշանակվել է Հայաստանի ազգային ֆիլարմոնիկ գործակալության նախագահ և մինչ 1994-ը եղել է Հայաստանի պետական ջազ-էստրադային նվագախմբի գեղարվեստական ղեկավարը։

1994-ին հիմնել և մինչև կյանքի վերջ ղեկավարել է Հայաստանի երգի պետական թատրոնը։

1995-1998-ին նշանակվել է Երևանի Երիտասարդական պալատի տնօրեն։

1995-1998-ին դասավանդել է Երևանի թատրոնի և կինոյի պետական ինստիտուտում։

2000-ին հիմնադրել է Երգի պետական թատրոնին կից՝ մանկապատանեկան երաժշտական դպրոց-ստուդիա, որն այժմ կրում է «Արթուր Գրիգորյանի անվան երգի ակադեմիա» անվանումը։

2001-ին ընտրվել է Հայաստանի հանրային հեռուստառադիոընկերության խորհուրդի անդամ, 2009-ից՝ խորհրդատու։

Ստեղծել ու բեմադրել է «ԱՅՈ», «777», «Ասուպ», «Ազգային երաժշտական մրցանակաբաշխություն», «Ընծա», «Ամենից Ամենա» փառատոններն ու մրցանակաբաշխությունները։

Ստեղծել ու արտադրել է «Կիրակի», «Հենց այնպես», «Տես» հեռուստահաղորդումները, «Կանաչ գոտի» և «Արցախի ձայներ» երաժշտական նախագծերը։

Հեղինակել է հազարից ավելի երգեր, չորս մանկական մյուզիքլներ, բազմաթիվ թեմատիկ համերգներ ու փառատոններ, զանգվածային միջոցառումներ, ներկայացումներ ու երաժշտական և ուսումնական նախագծեր։

1994թ. դեկտեմբերի 24, Հայաստան, Երևան